Dy turistë me shtetësi gjermane kanë humbur kontaktet ndërsa ndodheshin në malin e Polisit, në bashkinë e Librazhdit. Ngjarja ka ndodhur gjatë eksplorimit të zonës nga një grup që lëvizte me automjete të tipit rally.
Sipas informacioneve paraprake, kontaktet me personat e zhdukur janë ndërprerë që prej mbrëmjes së datës 8 qershor. Operacionet e kërkimit vështirësohen për shkak të terrenit të thellë malor, ku mungesa e mbulesës me valë telefonike e ka bërë komunikimin thuajse të pamundur.
Ekipet e specializuara të kërkim-shpëtimit janë mobilizuar dhe janë nisur drejt Librazhdit për të nisur ndërhyrjen dhe përpjekjet për lokalizimin e turistëve.