Organizata e njohur si Brigada e Veriut (Severna Brigada), e shpallur organizatë terroriste nga institucionet e Republikës së Kosovës, ka publikuar një material videografik me mesazhe të drejtpërdrejta kërcënuese. Në video shfaqen persona të armatosur, ndërsa njëri prej tyre pohon se ndodhet në një të ashtuquajtur “fushëbetejë” dhe paralajmëron se po përgatiten për të ardhur në Kosovë. Videoja është shpërndarë përmes rrjetit social Facebook në profilin e kësaj organizate.
Përmbajtja e videos shoqërohet me narrativë nacionaliste serbe, ku përmenden lidhjet midis Rusisë dhe Serbisë, si dhe shprehje kërcënuese ndaj institucioneve dhe qytetarëve. Personat në video përdorin gjuhë nxitëse, duke deklaruar se “gjithçka do të jetë Rusi” dhe duke u bërë thirrje të tjerëve që t’i presin pasi janë në proces përgatitjeje për ardhje. Njëri nga individët në video shprehet në gjuhën ruse, duke përshëndetur me fjalët: “Tung. Përshëndetje e madhe”.
Kujtojmë se Brigada e Veriut është shpallur organizatë terroriste nga autoritetet e Kosovës më 29 qershor 2023, për shkak të veprimtarive të saj destabilizuese në veriun e vendit.
Përditësime
Videoja e publikuar nga organizata terroriste Brigada e Veriut përmban mesazhe të drejtpërdrejta kërcënuese për sigurinë në Kosovë. Personat në video paralajmërojnë përgatitje për hyrje në territorin e Kosovës, duke deklaruar se: Po përgatitemi për Kosovën e shenjtë. Të shohim pastaj se çfarë do të ndodhë, kur të vijmë atje nga kjo fushëbetejë. Për më tepër, ata përdorin retorikë nacionaliste dhe revizioniste, duke theksuar se: Gjithçka do të jetë Rusi, vetëm Kosova Serbi. Në një tjetër pjesë të mesazhit, individët në video sfidojnë autoritetet duke deklaruar: Atëherë do të shohim kush jeni ju e kush jemi ne.