Gjithçka është gati për mbajtjen e Marshit për Liri, i cili do të zhvillohet më 12 shtator në Prishtinë. Organizatorët, përmes platformës qytetare Liria ka Emër, kanë bërë publike listën me oraret dhe vendet e nisjes së autobusëve nga komunat e ndryshme të Kosovës.
Ky marsh, i cili do të nisë në ora 14:00 në sheshin Skënderbeu, organizohet nën moton “Kosova po pret”. Qëllimi kryesor i këtij organizimi është ofrimi i mbështetjes për ish-krerët e Ushtrisë Çlirimtare të Kosovës (UÇK), të cilët aktualisht po gjykohen në Hagë. Organizatorët u kanë bërë thirrje qytetarëve që t'i bashkohen marshit së bashku me familjarët, miqtë dhe bashkëqytetarët e tyre, duke përcjellë mesazhet: “Për lirinë. Për çlirimtarët. Për UÇK-në.”
Përditësime
Organizatorët e platformës qytetare Liria ka Emër njoftuan se transporti me autobusë nga komunat e Kosovës për në Marshin për Liri do të jetë falas për të gjithë pjesëmarrësit. Ky vendim lehtëson aksesin e qytetarëve për ngjarjen e planifikuar më 12 shtator në Prishtinë.
Organizatorët Ismail Tasholli dhe Eliza Hoxha konfirmuan se marshi do të përfshijë performanca muzikore nga këngëtarët Shkurte Fejza dhe Arif Vladi. Ngjarja zhvillohet vetëm katër ditë para shpalljes së aktgjykimit për ish-krerët e UÇK-së, të parashikuar për datën 16 shtator.