Organizata e Veteranëve të Luftës së Ushtrisë Çlirimtare të Kosovës (OVL-UÇK) ka reaguar zyrtarisht ndaj gjuhës së urrejtjes dhe kërcënimeve të drejtpërdrejta të drejtuara ndaj ish-kreut të Aleancës për Ardhmërinë e Kosovës, Ramush Haradinaj. Në njoftimin e saj, organizata i ka cilësuar thirrjet publike për dhunë si akte kriminale që cenojnë sigurinë publike, rendin kushtetues dhe vlerat mbi të cilat është ndërtuar shtetësia e Kosovës.
OVL-UÇK ka përgëzuar Policinë e Kosovës dhe Prokurorinë për reagimin e shpejtë në identifikimin dhe arrestimin e të dyshuarit, i cili kishte bërë thirrje për pushkatim. Organizata ka theksuar se ky veprim kërkon një proces ligjor të rreptë dhe pa kompromis, duke kërkuar që drejtësia të veprojë me vendosmëri për t’i vënë shkelësit para përgjegjësisë.
Sipas reagimit, çdo kërcënim i kësaj natyre duhet të përballet me gjithë forcën e ligjit. OVL-UÇK ka paralajmëruar se çdo ngurrim institucional në trajtimin e këtij rasti mund të krijojë një precedent të rrezikshëm dhe të inkurajojë ata që synojnë të minojnë stabilitetin e vendit. Organizata ritheksoi se shteti është ngritur mbi sakrificën e atyre që fituan lirinë dhe se kërcënimet ndaj tyre nuk do të tolerohen.