Shërbimet e Komisariatit të Policisë Vau i Dejës, në bashkëpunim me Sektorin për Hetimin e Krimeve të Rënda të DVP Shkodër, kanë ndërhyrë gjatë orëve të para të mëngjesit për të parandaluar një ngjarje të mundshme kriminale. Pas informacioneve të siguruara në rrugë operative, efektivët kanë ndaluar një automjet në fshatin Stajkë, ku udhëtonte 38-vjeçari Euglen Buraku, banues në Spitallë të Durrësit.
Gjatë kontrollit, policia gjeti dhe sekuestroi një minë me telekomandë, e cila ishte e lidhur me një aparat celular për aktivizim në distancë. Përveç lëndës shpërthyese, policia sekuestroi në cilësinë e provës materiale edhe automjetin me të cilin udhëtonte i dyshuari, dy telefona celularë dhe një maskë.
Në lidhje me këtë rast, autoritetet kanë shpallur në kërkim shtetasin E. P., 34 vjeç, banues në Durrës, i cili dyshohet si bashkëpunëtor në këtë veprimtari të paligjshme.
Nën drejtimin e Prokurorisë, vijojnë veprimet hetimore për zbardhjen e plotë të rrethanave, përcaktimin e destinacionit dhe qëllimit të transportimit të mjetit shpërthyes, si dhe identifikimin e personave të tjerë që mund të jenë të përfshirë.