Sipas të dhënave nga Shërbimi Meteorologjik Ushtarak, dita e sotme do të ndikohet nga kushte atmosferike të qëndrueshme, me mot kryesisht të kthjellët dhe alternime vranësirash të pakta deri mesatare.
Në zonën e veriut dhe në relievet malore të lindjes, prej orëve të mesditës, vranësirat do të bëhen hera-herës deri të dendura. Në këto territore, nga mesdita deri në orët e pasdites, parashikohen reshje shiu të herëpashershme me intensitet të ulët, të cilat në malësi mund të shfaqen në formën e shtrëngatave të izoluara.
Era do të fryjë nga kuadrati i jugut me shpejtësi mesatare prej 7 m/s. Megjithatë, përgjatë vijës bregdetare dhe në zonat luginore, shpejtësia e erës pritet të arrijë deri në 16 m/s. Për sa i përket detit, valëzimi në Adriatik dhe Jon do të jetë i forcës 2 deri në 4 ballë.