Parlamenti Europian, në seancën plenare të zhvilluar në Strasburg më 21 janar 2026, refuzoi me shumicë dërrmuese propozimet e Këshillit të BE-së dhe Komisionit Europian për ndryshimin e rregullave mbi të drejtat e pasagjerëve të linjave ajrore. 632 eurodeputetë votuan pro refuzimit, 15 kundër dhe 9 abstenuan.
Propozimet e mbështetura nga Parlamenti përfshijnë bagazhe dore falas për çdo pasagjer, vende pa pagesë për fëmijët nën 12 vjeç pranë shoqëruesve dhe kompensime për vonesa fluturimesh prej të paktën tre orësh, pavarësisht distancës së udhëtimit. Eurodeputetët argumentojnë se ndryshimet e propozuara do të dobësonin mbrojtjen e konsumatorëve dhe do të përjashtonin rreth 80% të pasagjerëve nga kompensimi.
Rregullorja aktuale e BE-së, e miratuar në vitin 2004, parashikon kompensim nga 250 deri në 600 euro, në varësi të distancës, për vonesa prej të paktën tre orësh. Komisioni Europian, në vitin 2013, kishte propozuar rritjen e këtij kufiri në 5 orë për fluturime brenda BE-së ose deri në 3.500 km, 9 orë për fluturime jashtë BE-së nga 3.500 deri në 6.000 km dhe 12 orë për ato mbi 6.000 km. Këshilli i BE-së arriti marrëveshje politike më 5 qershor 2025, e publikuar në tetor të së njëjtës vit.
Liberalizimi i tregut të transportit ajror në BE, i përfunduar në vitin 1997, zgjeroi rrjetin e fluturimeve, uli çmimet e biletave dhe rriti numrin e pasagjerëve në mbi 1,1 miliardë në vitin 2024. Kjo solli mbingarkesë, vonesa, anulime dhe humbje bagazhesh.
Linjat ajrore, përmes shoqatës Airlines for Europe (A4E), ku bëjnë pjesë Lufthansa, Air France-KLM, Ryanair dhe IAG (pronare e British Airways), kanë ushtruar presion për rishikim, duke pretenduar se rregullat krijojnë shtrembërime konkurruese dhe rrisin kostot operacionale. Parlamenti, me anë të Komisionit për Transportin dhe Turizmin (TRAN), ka kundërshtuar këto ndryshime për një dekadë, duke i konsideruar si minuese të të drejtave të pasagjerëve.