Komiteti për Politikë të Jashtme i Parlamentit Evropian miratoi më 5 maj 2026 raportin vjetor për Malin e Zi, në të cilin vendi cilësohet si shteti më i avancuar në procesin e anëtarësimit në Bashkimin Evropian.
Raporti bën thirrje për forcimin e pavarësisë dhe efikasitetit të sistemit të drejtësisë, si dhe për rezultate të qëndrueshme në luftën kundër korrupsionit në nivel të lartë dhe krimit të organizuar. Theksohet nevoja për uljen e numrit të lëndëve të mbetura gjyqësore dhe për harmonizimin e plotë të politikës së vizave me atë të Bashkimit Evropian.
Autori i raportit, eurodeputeti Marjan Šarec, deklaroi se Mali i Zi përballet me një vit shumë sfidues. "Koha është e kufizuar, ndërsa punë ka ende. Ky raport duhet të shërbejë si njohje e progresit të deritanishëm dhe si inkurajim për periudhën në vazhdim. Para së gjithash, duhet të kuptohet si një thirrje për të gjitha palët e interesuara që të tregojnë urtësi dhe përgjegjësi, në mënyrë që mosmarrëveshjet e vogla të mos e errësojnë apo devijojnë përparimin drejt objektivave më të gjera strategjike", tha ai pas votimit.
Dokumenti u bën thirrje institucioneve shtetërore që dallimet politike të mos e vonojnë miratimin dhe zbatimin e reformave lidhur me Bashkimin Evropian. Anëtarësimi në BE duhet të mbetet prioritet i përbashkët kombëtar mbi interesat partiake. Parlamentit dhe Qeverisë së Malit të Zi u kërkohet që çështjet e identitetit të mos e largojnë vëmendjen nga procesi evropian.
Sipas raportit, përparimi i Malit të Zi, që ka mbyllur përkohësisht 14 nga 33 kapituj negociues, nuk varet vetëm nga reformat teknike, por edhe nga zhvillimet politike të përditshme dhe tensionet e brendshme, të cilat shpesh e ngadalësojnë përafrimin me standardet e BE-së.