Deputetët e Parlamentit të Serbisë miratuan një paketë ndryshimesh në ligjet e sistemit gjyqësor, të propozuara nga deputeti Uglješa Merdić i Partisë Progresive Serbe. Ai deklaroi se ndryshimet do ta bëjnë gjyqësorin më efikas dhe se përbëjnë hapin e parë për kthimin e tij te shteti dhe populli.
Opozita serbe e cilësoi miratimin si goditje ndaj pavarësisë së drejtësisë, duke thënë se ndryshimet ndikojnë në punën e Këshillit të Lartë të Prokurorisë. Kryetari i Gjykatës Kushtetuese, Vladan Petrov, kritikoi partinë në pushtet për moskonsultimin e Këshillit të Lartë Gjyqësor dhe Këshillit të Lartë të Prokurorisë mbi ndryshimet dhe plotësimet në ligjet gjyqësore.
Reagimet nga Bashkimi Evropian
Komisionerja për Zgjerimin e BE-së, Marta Kos, reagoi ashpër në rrjetin X, duke e quajtur votën "hap serioz prapa në rrugën e Serbisë drejt BE-së". Ajo theksoi se, në një kohë kur Mali i Zi dhe Shqipëria po ecin me shpejtësi drejt zgjerimit, Serbia rrezikon drejtimin e kundërt. Kos u bëri thirrje Asamblesë Kombëtare Serbe të rishikojë ndryshimet sa më shpejt dhe t'i përshtasë me standardet evropiane.
Brukseli vlerësoi se ndryshimet mund të përfaqësojnë hap të madh prapa, të përgatitura me nxitim dhe pa transparencë, pa konsultim me Komisionin Evropian apo Komisionin e Venecias.
Detajet e votimit dhe ligjeve
Votimi rezultoi me 138 deputetë pro dhe 37 kundër. Midis ligjeve të miratuara janë:
- Ligji për ndryshimet dhe plotësimet e Ligjit për selitë dhe juridiksionin e gjykatave dhe prokurorive publike;
- Ligji për ndryshimet e Ligjit për Këshillin e Lartë të Prokurorisë;
- Ligji për ndryshimet dhe plotësimet e Ligjit për Prokurorinë Publike;
- Propozimi për ndryshimin e Ligjit për gjyqtarët;
- Ligji për ndryshimet dhe plotësimet e Ligjit për organizimin dhe kompetencat e organeve shtetërore për luftën kundër krimit të teknologjisë së lartë.
Kritikët thonë se këto ndryshime forcojnë kontrollin e ekzekutivit dhe të presidentit Aleksandër Vuçiç mbi gjyqësorin, duke rrezikuar balancën e pushteteve.