Partia Demokratike reagoi zyrtarisht ndaj incidentit të ndodhur në ambientet e Ambasadës së Izraelit, ku një person i maskuar hoqi dhe grisi flamurin shtetëror. Përmes një deklarate, kjo forcë politike dhe kryetari i saj, Sali Berisha, e vlerësuan ngjarjen si një veprim që bie ndesh me marrëdhëniet tradicionale të miqësisë dhe respektit midis popullit shqiptar dhe atij izraelit.
Në qëndrimin e saj, Partia Demokratike theksoi se ky veprim nuk përfaqëson vlerat e qytetarëve shqiptarë dhe cënon frymën e bashkëjetesës. PD i bëri thirrje organeve ligjzbatuese që të marrin masa për identifikimin dhe ndëshkimin e personit përgjegjës sipas ligjit në fuqi.
Ky reagim pason dënimin zyrtar të ngjarjes nga Ministria për Evropën dhe Punët e Jashtme, e cila e cilësoi aktin si të pajustifikueshëm dhe të papajtueshëm me traditën e mikpritjes dhe harmonisë që karakterizon Shqipërinë. Pamjet e publikuara tregojnë se flamuri është hequr nga një person i maskuar gjatë zhvillimit të një proteste të shtunën.