Pas incidentit të ndodhur në Tiranë, ku u raportua për grisjen e flamurit të Izraelit, nismëtarët e protestës qytetare kundër qeverisë kanë reaguar duke u distancuar nga ky veprim. Arben Kola, në një prononcim për News24, deklaroi se lëvizja nuk ka asnjë agjendë fetare apo ndërkombëtare dhe se synon vetëm shprehjen e pakënaqësisë së qytetarëve.
Kola pohoi se brenda protestës ka grupe të infiltruara që po përpiqen të manipulojnë narrativën e lëvizjes. Ai paralajmëroi se në ditët në vijim do të bëhen publikë emrat dhe fytyrat e personave që, sipas tij, përfaqësojnë interesa të lidhura me grupe greke, serbe apo linja fetare nga Turqia dhe shtete të tjera. Ai u bëri thirrje institucioneve të sigurisë që të ndërhyjnë për të parandaluar tensionet e mëtejshme.
Në të njëjtën linjë, një protestues i pranishëm në tubim e dënoi ashpër aktin, duke e lidhur atë me historinë e mikpritjes së shqiptarëve ndaj hebrenjve gjatë Luftës së Dytë Botërore. Ai theksoi se veprimet e tilla nuk përfaqësojnë vullnetin e popullit shqiptar dhe janë kryer nga individë që kërkojnë të komprometojnë kauzën e protestuesve. Organizatorët theksuan se asnjë përpjekje për njollosje nuk do të arrijë të zhbëjë vendosmërinë e lëvizjes qytetare.