Pas incidentit të ndodhur mbrëmjen e kaluar pranë Ambasadës së Izraelit në Tiranë, ku një grup protestuesish hoqën dhe dëmtuan flamurin izraelit, Komuniteti Hebraik Shqiptar publikoi një deklaratë zyrtare duke e cilësuar veprimin si një akt urrejtjeje dhe sulm ndaj normave diplomatike.
Sipas komunitetit, kjo ngjarje nuk është një formë e pranueshme proteste, por një shkelje e rëndë e së drejtës ndërkombëtare. Në reagimin e tij, Komuniteti Hebraik shprehu indinjatë edhe për thirrjet e artikuluara gjatë tubimit, si "Izraeli është armiku ynë". Institucioni vlerëson se kjo gjuhë nxit antisemitizmin dhe synon të importojë në Shqipëri konflikte të huaja, duke cenuar kulturën e tolerancës dhe traditën e mbrojtjes së hebrenjve gjatë periudhës së Holokaustit.
Kërkesa për hetim dhe reflektim
Në vijim të deklaratës, komuniteti u ka bërë thirrje institucioneve shtetërore të identifikojnë dhe hetojnë autorët e përfshirë në këtë incident. Gjithashtu, është kërkuar nga politika, media dhe shoqëria civile që të refuzojnë çdo formë të gjuhës së urrejtjes, duke theksuar se normalizimi i propagandës së tillë mund të dëmtojë reputacionin ndërkombëtar të vendit.