Kryetari i Grupit Parlamentar të Partisë Socialiste, Taulant Balla, ka reaguar lidhur me incidentin e ndodhur mbrëmjen e së shtunës në ambientet e Ambasadës së Izraelit në Tiranë. Gjatë një proteste, një grup personash të maskuar kanë hequr dhe përdhosur flamurin e Izraelit.
Përmes një deklarate në rrjetet sociale, Balla vlerësoi se, ndonëse e drejta për të protestuar dhe shprehur qëndrimet politike është legjitime, cenimi i përfaqësive diplomatike dhe simboleve shtetërore nuk përputhet me vlerat e popullit shqiptar. Ai theksoi se historia e shqiptarëve njihet për respektin ndaj tjetrit dhe mbrojtjen e hebrenjve gjatë Holokaustit.
Duke e cilësuar ngjarjen si një akt të rëndë dhe të turpshëm, Balla kërkoi reagimin e organizatorëve të tubimit, duke u bërë thirrje atyre që të distancohen publikisht nga ky veprim i kryer nga protestues të maskuar.