Partia Socialiste zhvillon sot aktivitetin festiv për 35-vjetorin e themelimit në Sheshin Italia, në Tiranë. Eventi, i cili pason një tur vlerësimi në 12 qarqe të vendit, shënon kulminacionin e angazhimit të kësaj force politike, e cila aktualisht mban mandatin e katërt qeverisës.
Sipas burimeve, aktiviteti pritet të nisë në orën 18:00. I vetmi që do të mbajë fjalim është kryetari i partisë, Edi Rama, i cili do të përcjellë mesazhe për ecurinë politike dhe projektin në Zvërnec. Gjatë ceremonisë, ku socialistët do të qëndrojnë në këmbë, do të transmetohen materiale filmike mbi historikun e partisë. Ky përvjetor shënohet në mungesë të figurave historike si Fatos Nano dhe Servet Pëllumbi.
Masa sigurie dhe kufizime në qarkullim
Për mbarëvajtjen e këtij eventi dhe protestës së paralajmëruar në Bulevardin “Dëshmorët e Kombit”, Policia e Tiranës ka njoftuar masa të shtuara. Nga ora 16:00 e deri në përfundim të tubimeve, do të ketë kufizime të lëvizjes së automjeteve në akset e mëposhtme:
• Rruga “Papa Gjon Pali II” deri në rrugën “Ibrahim Rugova”;
• Segmenti nga kryqëzimi me rrugën “Libri Universitar” deri te sheshi “Shopen”;
• Bulevardi “Dëshmorët e Kombit” deri te sheshi “Nënë Tereza”.
Si pjesë e masave të sigurisë, baret dhe lokalet përreth stadiumit “Air Albania” do të qëndrojnë të mbyllura, ndërsa aksesimi i mediave brenda perimetrit të aktivitetit nuk do të lejohet. Aktiviteti zhvillohet në një distancë prej rreth 500 metrash nga vendi ku pritet të zhvillohet protesta opozitare, në të cilën kërkohet largimi i kryeministrit Edi Rama dhe liderit të opozitës Sali Berisha.
Përditësime
Organizatorët e 35-vjetorit të Partisë Socialiste kanë njoftuar ndryshimin e orarit të ceremonisë, e cila do të nisë në orën 17:30, 30 minuta më herët se planifikimi fillestar. Policia e Shtetit vijon të mbajë në fuqi masat e shtuara të sigurisë në perimetrin e eventit në Tiranë.