Një raport i Komisionit Ekonomik të Kombeve të Bashkuara për Europën i vitit 2024 tregon se pastrimi i parave ka qenë një faktor kontribuues në rritjen e çmimeve të strehimit në Tiranë dhe zonat bregdetare të Shqipërisë. Dokumenti vëren se ky fenomen, i shoqëruar me të ardhura të ulëta të disponueshme, ka bërë blerjen e një banese të re në zona të preferuara të papërballueshme për shumicën e qytetarëve.
Raporti thekson pasojat, duke përfshirë nivele të larta mbipopullimi, veçanërisht tek grupet me të ardhura të ulëta. Tirana renditet ndër shtatë qytetet kryesore evropiane me shkallën më të lartë të pamundësisë për strehim të përballueshëm.
Ekspertja e pavarur mbi çështjet e strehimit, Doris Andoni, ka deklaruar se problemi i çmimeve dhe i qirave është më kompleks dhe nuk mund të shpjegohet vetëm me marrëdhënien e kërkesës dhe ofertës. Sipas saj, roli i parasë informale në financimin e sektorit rezidencial mbetet një hipotezë që qarkullon prej vitesh në rrethet profesionale dhe akademike.
Qeveria shqiptare nuk ka ndërmarrë ende ndonjë nismë konkrete për të adresuar gjetjet e këtij raporti.