Partia Demokratike e Kosovës ka shprehur mbështetjen për marshin qytetar “Drejtësi, jo politikë!”, të thirrur nga platforma “Liria ka Emër” më 17 shkurt në Prishtinë, në Ditën e Pavarësisë së Republikës së Kosovës.
Partia ka nisur mobilizimin në të gjitha strukturat partiake anembanë Kosovës, me qëllim të angazhimit sa më të gjerë të qytetarëve për pjesëmarrje masive në këtë marsh.
Sipas njoftimit të PDK-së, marshi është thirrje e ligjshme dhe paqësore për drejtësi të paanshme, në mbrojtje të luftës çlirimtare të Kosovës dhe të luftëtarëve të lirisë Hashim Thaçi, Kadri Veseli, Jakup Krasniqi, Rexhep Selimi si dhe bashkëluftëtarëve të tyre. Këta po përballen me procese gjyqësore në Hagë, të cilat kanë hyrë në fazën përmbyllëse. PDK kërkon drejtësi të plotë, të barabartë dhe larg çdo ndikimi politik.
Partia rithekson se lufta e Ushtrisë Çlirimtare të Kosovës ishte e drejtë dhe çlirimtare, e lindur nga nevoja për liri dhe dinjitet. Çdo përpjekje për ta relativizuar këtë të vërtetë historike përbën padrejtësi ndaj sakrificës së popullit të Kosovës.
PDK fton qytetarët që, në frymën e unitetit dhe respektit institucional, të bashkohen më 17 shkurt në Prishtinë për të kërkuar drejtësi dhe për nderuar sakrificën çlirimtare mbi të cilën është ndërtuar Republika e Kosovës.