Në Katedralen "Ngjallja e Krishtit" në Tiranë, këtë të dielë XV të Llukait dhe në ditën e nderimit të Shën Grigor Theologut, u kremtuan Shërbesat e Mëngjesores dhe Liturgjia Hyjnore me rastin e përkujtimit të njëvjetorit të ndarjes nga jeta të Kryepeshkopit të lumur Anastas.
Shërbesat e Shenjta i drejtoi Fortlumturia e Tij, Kryepeshkopi Joan, i shoqëruar nga Mitropoliti i Gjermanisë Qendrore, Hirësi Isaaku, dhe të gjithë anëtarët e Sinodit të Shenjtë të Kishës Ortodokse Autoqefale të Shqipërisë: Mitropoliti i Fierit, Hirësi Nikolla; Mitropoliti i Elbasanit, Hirësi Andoni; Mitropoliti i Gjirokastrës, Hirësi Nathanaili; Mitropoliti i Beratit, Hirësi Asti; dhe Mitropoliti i Korçës, Hirësi Anastasi. Pjesë mori gjithashtu Mitropoliti i Akaias, Hirësi Athanasi, si dhe klerikë të shumtë nga Shqipëria dhe jashtë saj.
Në ceremoni morën pjesë krerë të komuniteteve fetare, ambasadorë, përfaqësues të lartë të Këshillit Botëror të Kishave, të Komunitetit të Sant’Egidios dhe të Qendrës së Krishterë Misionare në Amerikë, së bashku me besimtarë të shumtë.
Në fjalën e tij, Kryepeshkopi Joan theksoi se përkujtimi vjetor i Kryepeshkopit të lumur Anastas është nevojë shpirtërore për reflektim, falënderim dhe forcim në hirin e Perëndisë Triadik. Ai vuri në dukje se largimi i njerëzve të mëdhenj lë trishtim dhe boshllëk, por besimi në Ngjalljen e Krishtit dhe përjetësinë e shpirtit sjell ngushëllim dhe shpresë.
Sipas Kryepeshkopit Joan, ky përkujtim nuk është kthim nostalgjik në të kaluarën, por zgjedhje e vetëdijshme për të mbajtur gjallë trashëgiminë shpirtërore dhe njerëzore të tij. “Ata që duam dhe i humbasim nuk janë aty ku ishin më parë; tani janë kudo ku jemi ne”, u shpreh ai, duke theksuar se kjo prani jep kurajë, shpresë dhe lehtësim.
Pas Liturgjisë Hyjnore, u krye Shërbesa e Përshpirtjes në kriptën e Katedrales, ku prehet trupi i Kryepeshkopit të lumur Anastas.