Reshjet e fundit të shiut kanë shkaktuar përmbytje në disa banesa në Njësinë Administrative Bradashesh, pranë zonës së Ish-Kombinatit Metalurgjik në Elbasan. Kjo situatë ka rikthyer shqetësimin tek banorët.
Strukturat e Emergjencave Civile pranë Bashkisë Elbasan kanë njoftuar se përkeqësimi i situatës erdhi për shkak të bllokimit të kanaleve kulluese. Këto dyshohen se janë mbushur me inerte nga kompania Sallillari. Autoritetet theksojnë se kjo është hera e dytë që kompania akuzohet për ndërhyrje të papërgjegjshme në sistemin kullues të zonës.
Një faktor tjetër është dalja nga shtrati e përroit të Kushës, i cili është mbushur me mijëra metra kub inerte. Kjo ka ulur kapacitetin për të përballuar prurjet e ujit gjatë reshjeve intensive.
Banorët janë shprehur të revoltuar dhe kërkojnë pastrimin e menjëhershëm të kanaleve si dhe rikthimin e përroit në parametrat normalë, për të parandaluar përmbytje të tjera.
Ndërkohë, institucionet përgjegjëse po kryejnë verifikime në terren për të përcaktuar përgjegjësitë. Ato planifikojnë të marrin masa administrative dhe ligjore ndaj subjekteve të përfshira. Po punohet gjithashtu për hapjen e kanaleve kulluese nga kompania Sallillari.
Përditësime
Firma Sallillari po ndërton urën e rrugës Papërr–Elbasan (Korridori VIII) mbi përroin Kushë në fshatin Katund i Ri. Ura ka rreth 100 metra gjatësi dhe këmbëza që devijojnë rrjedhën e ujit.
Banori Nexhip Meta raporton dëme në 18 koshere bletësh dhe dhjetëra pulë. Uji arriti mbi gjysmë metri në shtëpinë e tij – hera e tretë që përmbytet.
Drejtuesit e Sallillarit thonë se situata është komplekse: sheshi i punimeve u përmbyt duke dëmtuar mjete pune, ndërsa mungon shpronësimi shtetëror i një banese pranë urës.