Pas përfundimit të seancës plenare në Kuvend, një grup protestuesish ndërmorën një aksion duke bllokuar hyrjet e institucionit. Gjatë këtij tubimi, protestuesit goditën me vezë dhe sende të tjera automjetet e deputetëve që po largoheshin nga zona.
Si pasojë e përplasjes me efektivët e policisë, të cilët ndërhynë për të zhbllokuar rrugën, u shoqëruan në polici tre persona, ndër të cilët edhe Dritan Goxhaj. Për të menaxhuar situatën dhe për të shpërndarë turmën, në ndihmë të forcave të rendit u angazhuan edhe efektivë të FNSH-së, të cilët ishin të pajisur me skafandra dhe shkopinj gome.
Pas shoqërimit të protestuesve, një pjesë e turmës është drejtuar para godinës së Drejtorisë së Policisë Tiranë, duke kërkuar lirimin e tyre.
Përditësime
Policia e Shtetit ka identifikuar dhe shoqëruar katër persona të tjerë në lidhje me protestën përpara Kuvendit: Shkëlzen Bushi, Mandi Jatagani, Asim Prengzi dhe Erjon Taipi. Sipas autoriteteve, personat e shoqëruar dyshohen për dëmtimin e automjeteve të deputetëve dhe anëtarëve të kabinetit qeveritar gjatë tubimit.