Përplasjet mes deputetëve të opozitës dhe shumicës parlamentare në Kuvendin e Shqipërisë tërhoqën vëmendjen e mediave ndërkombëtare. Gjatë seancës së së enjtes, deputetët e opozitës tentuan të pengonin zhvillimin normal të punimeve, duke hedhur sende dhe shkulur mikrofonat nga tavolinat e anëtarëve të shumicës qeverisëse.
Gjatë tensioneve, deputetët opozitarë ngritën fotografi të studentëve të plagosur nga policia gjatë protestave në Tiranë. Me këtë veprim, ata e lidhën aksionin në Kuvend me kërkesat e demonstruesve.
Ngjarja u pasqyrua nga media të huaja, mes tyre The Guardian, e cila raportoi për përplasjet fizike mes deputetëve dhe tensionet gjatë seancës parlamentare. Media të tjera ndërkombëtare publikuan pamje dhe raportime për incidentet, përfshirë përpjekjet e deputetëve të opozitës për të bllokuar foltoren dhe hedhjen e sendeve drejt përfaqësuesve të shumicës.
Përplasjet në Kuvend ndodhën në një klimë të tensionuar politike. Jashtë godinës vijonin protestat e studentëve dhe qytetarëve, të cilët kërkonin më shumë mbështetje për arsimin dhe dorëheqjen e kryeministrit Edi Rama.