Ish-drejtori i Policisë së Shkodrës, Gentjan Berberi, është pezulluar nga detyra për shkak të një incidenti të ndodhur në ambientet e Drejtorisë së Përgjithshme të Policisë së Shtetit. Vendimi është marrë nga Drejtori i Përgjithshëm, Skënder Hita, ndërsa Drejtoria e Standardeve Profesionale ka nisur një procedurë disiplinore.
Sipas raportimeve, konflikti ka ndodhur kur Berberi është paraqitur në zyrën e drejtoreshës së Burimeve Njerëzore për të kundërshtuar emërimin e tij në sektorin e Analizës, detyrë kjo që iu caktua pas lirimit nga posti në qarkun e Shkodrës. Ky i fundit ishte larguar nga detyra për shkak të performancës së dobët në luftën kundër kultivimit të kanabisit.
Zyrtarja e Burimeve Njerëzore ka depozituar një kallëzim penal pranë Agjencisë së Mbikëqyrjes Policore (AMP), duke pretenduar se Berberi ka ushtruar presion verbal, ka përdorur fjalor fyes dhe e ka kërcënuar atë gjatë ushtrimit të detyrës. Aktualisht, AMP po kryen verifikimet e nevojshme për zbardhjen e rrethanave të ngjarjes, ndërsa ndaj ish-drejtorit pritet të merren masa të mëtejshme në varësi të përfundimeve të hetimeve administrative dhe penale.