Ish-drejtori i Policisë së Shkodrës, Gentian Berberi, është përjashtuar nga radhët e Policisë së Shtetit pas një vendimi të marrë nga Drejtoria e Standardeve Profesionale. Masa disiplinore erdhi pas një incidenti të ndodhur në ambientet e Drejtorisë së Përgjithshme të Policisë.
Berberi ishte transferuar më herët në sektorin e Analizës, pas shkarkimit nga detyra si drejtues i Policisë Vendore të Shkodrës për shkak të performancës së dobët në luftën kundër kultivimit të kanabisit. I pakënaqur me lëvizjen, ai dyshohet se është paraqitur në zyrën e drejtoreshës së Burimeve Njerëzore, ku ka përdorur gjuhë fyese dhe ka ushtruar presion verbal ndaj saj.
Pas këtij incidenti, drejtoresha ka depozituar një kallëzim penal pranë Agjencisë së Mbikëqyrjes Policore (AMP). Drejtori i Përgjithshëm i Policisë së Shtetit, Skënder Hita, urdhëroi pezullimin e menjëhershëm të Berberit dhe nisjen e hetimit disiplinor.
Aktualisht, vendimi për përjashtimin e Berberit nuk është përfundimtar. Çështja pritet të shqyrtohet nga Komisioni i Apelimit, i cili do të vendosë nëse largimi nga sistemi i policisë do të jetë i përhershëm.