Në paraditen e 24 prillit 2026, në fshatin Gurëz të bashkisë Kurbinit, një 35-vjeçar mbeti i plagosur me armë zjarri pas një konflikti për motive të dobëta.
Sipas veprimeve të para hetimore të Policisë, A. T., i njohur si Akil Tahiri, është konfliktuar me shtetasin Fation Cobelita, alias Fation Staka, 40 vjeç, banues në fshatin Gorre të Kurbinit. Ky i fundit dyshohet se ka qëlluar me pistoletë në drejtim të 35-vjeçarit, duke e plagosur në këmbë.
Pas ngjarjes, i plagosuri u transportua në Spitalin e Laçit nga shtetasi Renato Marku, 26 vjeç, banues në të njëjtin fshat. Marku u largua nga ambientet e spitalit, duke braktisur automjetin me të cilin udhëtonte.
Rreth orës 10:20, i plagosuri mbërriti në Spitalin e Laçit, ku mjeku roje A. I., 58 vjeç, nuk njoftoi Policinë, por e dërgoi direkt për mjekim të specializuar në Spitalin e Traumës në Tiranë.
Policia i ka shpallur në kërkim:
• F. C. alias F. S., 40 vjeç, për veprat penale plagosje e rëndë me dashje dhe mbajtja pa leje dhe prodhimi i armëve, armëve shpërthyese dhe i municionit;
• R. M., 26 vjeç, për veprën penale moskallëzimi i krimit.
Gjithashtu, mjeku A. I. është proceduar penalisht në gjendje të lirë për shpërdorim detyre.
Policia vazhdon punën për kapjen e autorëve të dyshuar dhe dokumentimin e plotë ligjor të ngjarjes, në bashkëpunim me Prokurorinë pranë Gjykatës së Juridiksionit të Përgjithshëm Lezhë.