Ngjarja ka ndodhur rreth orës 21:00, kur autoritetet policore janë njoftuar për një person të plagosur në fshatin Miradi e Epërme të Fushë-Kosovës. Zëdhënësi i Policisë së Kosovës për rajonin e Prishtinës, Enis Pllana, ka konfirmuar se njësitet përkatëse kanë dalë menjëherë në vendin e ngjarjes për të kryer hetimet fillestare.
Sipas informacioneve të autoriteteve, i lënduari është dërguar për trajtim mjekësor dhe ndodhet jashtë rrezikut për jetën. Burime policore bëjnë të ditur se personat e përfshirë në këtë ngjarje janë anëtarë të së njëjtës familje, ndërsa i dyshuari për plagosjen është axha i viktimës.
Aktualisht, Policia po ndërmerr të gjitha veprimet e nevojshme procedurale për të zbardhur rrethanat e plota dhe motivin e ngjarjes. Rasti është klasifikuar nga prokurori kompetent si Vrasje në tentativë, ndërsa personi i dyshuar ndodhet në arrati dhe është në kërkim nga organet e rendit.