Një ngjarje e rëndë është regjistruar rreth orës 17:30 të së dielës në lagjen “Lugina” të Shijakut, ku një konflikt për motive të dobëta ka përfunduar me përdorimin e armës së zjarrit.
Sipas informacioneve të Policisë, gjatë një përplasjeje, shtetasi Elton Beqiri dyshohet se ka qëlluar me armë zjarri në këmbë shtetasin Bjondi Guri. I plagosuri, i cili është pronar i një lokali në zonë, është transportuar menjëherë në spital për të marrë ndihmën e nevojshme mjekësore. Sipas të dhënave, ai ndodhet nën kujdesin e mjekëve dhe jashtë rrezikut për jetën.
Menjëherë pas njoftimit, shërbimet e Policisë kanë mbërritur në vendngjarje, kanë rrethuar zonën dhe kanë nisur kontrollet intensive për lokalizimin dhe arrestimin e autorit të dyshuar, Elton Beqiri. Ndërkohë, grupi hetimor, nën drejtimin e Prokurorisë, po vijon punën për sqarimin e plotë të rrethanave dhe dokumentimin ligjor të ngjarjes.