Një rast i plagosjes me armë zjarri ka ndodhur këtë të enjte në qytetin e Vushtrisë. Ngjarja është raportuar rreth orës 15:00, në afërsi të Urës së Sitnicës.
Zëdhënësi i Policisë së Kosovës për rajonin e Mitrovicës, Avni Zahiti, ka konfirmuar se viktima, një mashkull madhor, është dërguar për trajtim mjekësor pas lëndimeve të marra. Pas marrjes së informatës, efektivët e policisë kanë ndërmarrë veprimet e nevojshme operative dhe hetimore në vendin e ngjarjes.
Në kuadër të hetimeve paraprake, autoritetet kanë shoqëruar për intervistim katër persona, të cilët dyshohen për pjesëmarrje në këtë ngjarje. Ndërkohë, policia është vënë në kërkim të personit të dyshuar, i cili aktualisht ndodhet në arrati. Veprimet e mëtejshme hetimore po zhvillohen në koordinim me prokurorin kompetent për të zbardhur rrethanat e plota të rastit.