Avokati Plarent Ndreca, mbrojtësi ligjor i kryebashkiakut të Tiranës Erion Veliaj, ka shprehur kritika të ashpra lidhur me ecurinë e procesit penal ndaj klientit të tij. Në një intervistë për emisionin "Kjo Javë", Ndreca deklaroi se prokuroria po e përdor masën e sigurimit jo thjesht për të kufizuar lirinë e Veliajt, por për ta penguar atë të ushtrojë detyrën e kryetarit të bashkisë.
Sipas avokatit, procesi ka shfaqur probleme që nga nisja e tij, duke pretenduar se kallëzimi fillestar ka hyrë në rrugë të paqarta në organin e akuzës dhe ka ardhur nga një burim fiktiv. Ndreca u shpreh se Veliaj është zyrtari i parë në 35 vitet e fundit në Shqipëri që i nënshtrohet një "vettingu penal" të tillë.
Në lidhje me rrjedhën e hetimeve, avokati theksoi se hetimi tashmë ka përfunduar dhe kërkoi transparencë në seancat gjyqësore, duke kundërshtuar zhvillimin e tyre "në skuta apo në errësirë". Ai përmendi gjithashtu standardet e Gjykatës së Strasburgut, sipas të cilave masa e sigurimit duhet të verifikohet çdo 2 muaj. Ndreca argumentoi se mbajtja e Veliajt në burg për 15 muaj lidhur me këto prova përbën një strategji "viktimizuese" nga ana e prokurorisë, duke shtuar se autoriteti i fituar përmes votës së qytetarëve nuk duhet të shihet si rrezik për hetimin.