Gjatë protestës së zhvilluar mesditën e së martës para Parlamentit në Tiranë, Policia e Shtetit ka kryer arrestimin e disa personave, ndër të cilët Dritan Goxhaj dhe Shkëlzen Bushi. Të dy personat njihen si organizatorë dhe pjesëmarrës aktivë në protestat që po zhvillohen prej 30 ditësh në kryeqytet.
Ndërhyrja e forcave të rendit kishte për qëllim shpërndarjen e protestuesve dhe lirimin e hyrjes së institucionit, e cila ishte bllokuar nga pjesëmarrësit. Pas këtyre zhvillimeve, situata u tensionua ndjeshëm. Në përplasje e sipër, automjeti i zëvendëskryeministres Albana Koçiu u godit me vezë nga protestuesit. Policia ka vijuar me veprimet e nevojshme për të rivendosur rendin në zonën përreth Parlamentit.