Policia e Kosovës ka ndaluar një rast të dyshuar kontrabande në fshatin Hodonovc të komunës Kamenicës, në kuadër të Planit Operativ “Gatishmëria Vepruese 2026”.
Njësitë e Policisë Kufitare, pas sigurimit të informacioneve operative dhe vëzhgimit me mjete teknike, kanë identifikuar aktivitet të dyshimtë dhe kanë reaguar menjëherë. Si rezultat, është ndaluar një traktor që dyshohet se ka hyrë ilegalisht nga territori i Serbisë në Kosovë.
Mjeti është ndaluar në Hodonovc, ndërsa vozitësi, personi me inicialet L.H. (1968), është intervistuar në cilësi të të dyshuarit. Gjatë kontrollit të traktorit, policia ka gjetur dhe sekuestruar mallra të dyshuara si të kontrabanduara, konkretisht pjesë për mjete bujqësore në vlerë mbi 5 mijë euro.
Të gjitha veprimet janë ndërmarrë në koordinim me prokurorin kompetent. Rasti po hetohet më tej nga njësitë përkatëse të Policisë Kufitare.
Policia e Kosovës ka theksuar përkushtimin për luftimin e kontrabandës dhe aktiviteteve ilegale, me qëllim garantimin e rendit dhe sigurisë.