Për shkak të zhvillimit të dy aktiviteteve paralele në kryeqytet, përkatësisht një proteste qytetare dhe organizimit për 35-vjetorin e themelimit të Partisë Socialiste, autoritetet policore kanë njoftuar bllokimin e një sërë rrugësh. Protesta, e cila vijon prej ditësh, kërkon ndër të tjera pezullimin e projektit në Zvërnec, shfuqizimin e ligjit për zonat e mbrojtura dhe dorëheqjen e kryeministrit Edi Rama.
Sipas njoftimit zyrtar të Policisë së Tiranës, nga ora 16:00 e deri në përfundim të aktiviteteve, qarkullimi i automjeteve nuk do të lejohet në akset e mëposhtme:
• Bulevardi “Dëshmorët e Kombit” deri te sheshi “Nënë Tereza”;
• Rruga “Papa Gjon Pali II”;
• Rruga “Dervish Hima”;
• Rruga “Faik Konica”;
• Rruga “Lekë Dukagjini”;
• Rruga “Gjergj Filipi”;
• Rruga “Hasim Zeneli”;
• Rruga “Themistokli Gërmenji”;
• Rruga “Ibrahim Rugova” (nga kryqëzimi me rrugën “Libri Universitar” deri te sheshi “Shopen”).
Policia ka apeluar për mirëkuptimin e qytetarëve, duke i këshilluar ata të përdorin akse rrugore alternative dhe të ndjekin udhëzimet e shërbimeve të uniformave blu në terren për shmangien e vështirësive në qarkullim.