Operacioni policor i koduar Koordinimi, i zhvilluar nga Drejtoria Vendore e Policisë Fier dhe Komisariati i Policisë Divjakë, zbuloi një plantacion me 1426 bimë kanabis në një tokë shtetërore pranë Rezervuarit të Divjakës. Krahas bimëve, në një ambient të përshtatur për përpunim, u sekuestruan 37 kilogramë kanabis në proces tharjeje dhe 7 kilogramë në formë boçesh.
Në vijim të veprimeve hetimore, autoritetet proceduan penalisht në gjendje të lirë tre punonjës të Administratës Rajonale të Zonave të Mbrojtura (ADZM) në qarkun Fier, për veprën penale të “Shpërdorimit të detyrës”. Të proceduarit janë:
• Edison Toromëni, 33 vjeç, përgjegjës sektori;
• Festim Hoxha, 37 vjeç, specialist menaxhimi;
• Gazmor Allka, 53 vjeç, roje.
Autoritetet vijojnë hetimet për të identifikuar autorët e drejtpërdrejtë të kultivimit të bimëve në zonën e Divjakës.
Operacioni në Has
Një aksion tjetër kundër kultivimit të kanabisit është raportuar në njësinë administrative Golaj të Hasit, konkretisht në fshatin Vlahën. Pas konstatimit të një numri bimësh narkotike, të cilat u asgjësuan me djegie, policia ka arrestuar shtetasit Rr. U., 70 vjeç, dhe B. U., 34 vjeç (babë e bir). Po ashtu, është shpallur në kërkim shtetasi A. U., 44 vjeç, ndërsa ka nisur procedimi penal në gjendje të lirë për Rr. S., 58 vjeç, me detyrë kryetar i fshatit Vlahën.