Në një ceremoni zyrtare të mbajtur për të shënuar një shekull të themelimit, Prefektura e Tiranës vlerësoi rolin historik të këtij institucioni në konsolidimin e shtetit shqiptar. Prefekti i Qarkut Tiranë, Shkëlqim Hajdari, e cilësoi Prefekturën si një simbol të autoritetit shtetëror dhe ligjshmërisë, duke nënvizuar se përvoja e fituar ndër dekada e bën të domosdoshme rritjen e kompetencave të prefektit si përfaqësues i Këshillit të Ministrave në qark.
Sipas Hajdarit, një rol më i fuqizuar do të ndikonte drejtpërdrejt në përmirësimin e koordinimit institucional, mbrojtjen e interesit publik dhe menaxhimin më efektiv të agjencive civile, si dhe të jetës ekonomike, arsimore, sportive e kulturore të qarkut. "Një prefekturë më e fortë do të thotë një shtet më i organizuar dhe më shumë siguri për qytetarët", u shpreh ai.
Presidenti Bajram Begaj vlerësoi gjithashtu rrugëtimin njëshekullor të institucionit, duke e lidhur atë me sfidat, përgjegjësitë dhe transformimet që ka kaluar shteti shqiptar. Në fjalën e tij, kreu i shtetit theksoi rolin e prefekturës si faktor stabiliteti, veçanërisht në situata krizash dhe fatkeqësish natyrore.
Në kuadër të këtij jubileu, të pranishmit vizituan një ekspozitë fotografike me dokumente arkivore që pasqyrojnë veprimtarinë e institucionit që nga themelimi i tij më 24 qershor 1926. Ngjarja shërbeu edhe si një moment mirënjohjeje për të gjithë prefektët dhe punonjësit që kanë shërbyer në këtë institucion gjatë këtyre 100 viteve.