Në ceremoninë e Samitit të Katërt të Diasporës, të zhvilluar në Tiranë dhe në Pallatin e Kongreseve, Presidenti i Republikës Bajram Begaj ka dekoruar disa personalitete të shquara të diasporës shqiptare për kontributet e tyre në fusha të ndryshme.
Mes të nderuarve ishte Lorik Cana, ish-kapiteni i Kombëtares shqiptare, i cili u vlerësua me Urdhrin e Skënderbeut. Gjatë fjalës së tij, Cana u shpreh se gjatë gjithë karrierës dhe jetës së tij është përpjekur të përfaqësojë me dinjitet Shqipërinë dhe të mbajë lart krenarinë e shqiptarëve kudo në botë.
Ai u shpreh: «Gjithmonë kur jeni pranë një paneli me njerëzit tonë të mbledhur që kanë spikatur, pavarësisht se kemi luajtur në stadiume plot mbetet një diçka e veçantë. Më e veçantë kur ka të bëjë me një urdhër dhe mirënjohje duke pasur një vlerësim mbetet një krenari. Nuk e pranoj vetëm në emrin por në emrin e familjes sime, Agimit, gjyshërve, Ganiu ish delegat, xhaxhait tim. Duke shkuar deri te gjithë ky brum që na ka frymëzuar».
Personalitete të tjera të dekoruara përfshijnë:
- Gentian Toshkëzi, Kalorës i Urdhrit Suprem të Shqiponjës;
- Klarita Gërxhani, Kalorës i Urdhrit të Lisit Akademik;
- Shqiponjë Telhaj, Kalorës i Urdhrit të Lisit Akademik;
- Markus Schuhmann, Oficer i Urdhrit të Skënderbeut;
- Andres Lindberg, Oficer i Urdhrit të Skënderbeut.