Presidenti i Republikës, Bajram Begaj, ndodhet për një vizitë zyrtare në Moldavi, ku u prit më 19 janar nga Presidentja Maia Sandu. Takimet u zhvilluan fillimisht në format tête-à-tête dhe më pas në prani të delegacioneve përkatëse.
Diskutimet u përqendruan në thellimin e marrëdhënieve dypalëshe, sigurinë rajonale, situatën e ndërlikuar gjeopolitike dhe unitetin evropian përballë sfidave të tilla. Presidenti Begaj u shpreh se “Shqipëria mbështet popullin moldav në ndërtimin e një të ardhmeje demokratike, të begatë dhe evropiane, në një kontekst gjeopolitik dhe sigurie mjaft sfidues të shënuar nga agresioni i paprovokuar dhe i pajustifikuar rus kundër Ukrainës dhe kërcënimet e sigurisë që burojnë prej tij”.
Krerët e dy shteteve rikonfirmuan angazhimin e përbashkët për anëtarësimin në Bashkimin Evropian. Në konferencën për gazetarët, Begaj dhe Sandu konfirmuan bashkëpunimin për përmbushjen sa më të shpejtë të agjendës evropiane, përmes progresit të bazuar në meritë dhe reformave.
Presidenti Begaj theksoi se “Shqipëria beson se zgjerimi i Bashkimit Evropian mbetet një nga instrumentet më efektive për garantimin e sigurisë, stabilitetit, begatisë dhe paqes së qëndrueshme në Evropë. Shqipëria shpreh mbështetjen e plotë për anëtarësimin e Moldavisë në Bashkimin Evropian”. Ai shprehu mbështetje për politikat proevropiane të Presidentes Sandu, duke vlerësuar qëndrimin e Moldavisë përballë ndikimeve keqdashëse, presioneve dhe fushatave dezinformuese, si dhe angazhimin për ndërtimin e një shteti demokratik, pjesë integrale e familjes evropiane.
Në këtë kontekst, Begaj nënvizoi synimin e Shqipërisë për të thelluar bashkëpunimin duke shfrytëzuar mekanizmat e Memorandumit të Mirëkuptimit për Integrimin Evropian, të nënshkruar së fundmi. Ai deklaroi se “Shqipëria qëndron pranë Moldavisë si mike, si partnere dhe si aspirante e përbashkët për anëtarësim në Bashkimin Evropian”.
Përditësime
Presidenti Bajram Begaj kërkoi njohjen e Kosovës nga Moldavi. Ai argumentoi se kjo do të sjellë stabilitet në rajon.