Gazetari Berat Buzhala ka ngritur pretendime lidhur me rastin e profilit të dyshuar si të rremë në rrjetet sociale, të njohur si Lule Gjeli, duke vënë në qendër të vëmendjes emrin e Gent Prokshit. Gjatë një paraqitjeje në emisionin Rubikon në televizionin Klan Kosova, Buzhala pohoi se posedon informacione nga burimet e tij, sipas të cilave Prokshi është parë duke hyrë në shtëpinë e kryeministrit në detyrë, Albin Kurti.
Në deklaratën e tij, gazetari theksoi nevojën për një reagim zyrtar nga ana e kryeministrit. Ai i kërkoi Kurtit që të flasë hapur dhe të sqarojë rrethanat në të cilat është parë personi në fjalë në ambientet e shtëpisë së tij. Deri në këto momente, nuk ka pasur asnjë reagim apo sqarim publik nga kryeministri Albin Kurti në lidhje me këto pretendime të shfaqura në media.
Përveç kësaj, Buzhala solli në vëmendje edhe një dëshmi të mëparshme të ish-zëvendëskryeministrit Haki Abazi. Sipas gazetarit, Abazi ka pranuar publikisht se ka zhvilluar një takim me Gent Prokshin gjatë kohës që të dy ndodheshin në Shtetet e Bashkuara të Amerikës.