Kryeqyteti i Kosovës, Prishtina, shënon sot 27-vjetorin e Ditës së Çlirimit përmes një sërë ngjarjesh përkujtimore dhe festive të organizuara nga Komuna e Prishtinës.
Ceremonitë zyrtare nisën në orën 10:00 me homazhe te Varrezat e Dëshmorëve në lagjen Velani, ku morën pjesë kryetari i kryeqytetit, Përparim Rama, kabineti i tij dhe ish-komandanti i Zonës Operative të Llapit, Rrustem Mustafa. Pas kësaj, delegacioni bëri nderime dhe vendosi kurora lulesh pranë shtatores së heroit Zahir Pajaziti.
Në orën 11:00, në Sallën e Kuvendit Komunal, u mbajt seanca solemne ku morën pjesë përfaqësues të institucioneve, veteranë të luftës dhe personalitete të jetës publike. Një ndër aktivitetet qendrore të ditës është Marshi i UÇK-së, i cili filloi në orën 12:00 nga Sheshi “Zahir Pajaziti” drejt Sheshit “Skënderbeu”, ku ish-luftëtarët parakaluan me uniformat e luftës.
Programi festiv vazhdon në orën 18:00 në stadiumin “Fadil Vokrri” me aktivitetin sportiv “Ndeshja e Yjeve – Miqtë e Futbollit”. Festimet përmbyllen në Sheshin “Skënderbeu” me koncertin festiv që nis në orën 18:30 dhe do të zgjasë deri në orën 23:00. Për qytetarët do të performojnë artistë dhe grupe muzikore, si:
• Ansambli “Bajram Curri”
• Shkolla e Muzikës “Prenk Jakova”
• Grupet Zwada dhe Blla Blla Blla
• DJ të ndryshëm
Përditësime
Kuvendi Komunal i Prishtinës shënoi 27-vjetorin e Ditës së Çlirimit përmes një seance solemne, e cila nisi me një minutë heshtje për të rënët. Gjatë këtij organizimi: ish-pjesëtari i UÇK-së, Islam Kelmendi, foli për rëndësinë historike të uniformës së ushtrisë; veteranët marshuan në kryeqytet duke kërkuar lirimin e ish-udhëheqësve të UÇK-së që po mbahen në Hagë; ndërsa kryetari i Prishtinës, Përparim Rama, vlerësoi sakrificën e dëshmorëve dhe konfirmoi përkushtimin për mbrojtjen e vlerave të lirisë.