Komuna e Prishtinës ka hyrë në fazën e dytë të projektit për instalimin e kamerave të sigurisë në hapësirat publike. Drejtori i Drejtorisë për Siguri dhe Emergjenca, Lulzim Fushtica, konfirmoi se plani synon shtimin e 55 lokacioneve të reja, duke e çuar numrin total në mbi 120 lokacione në të gjithë kryeqytetin.
Një risi e kësaj faze është mbikëqyrja e të gjitha parqeve në qytet. Në këtë listë përfshihen Parku i Gërmisë, Parku i Qytetit, Parku i Arbërisë, si dhe zonat e Taukbahçes, Ulpianës dhe Dardanisë. Ky vendim ndërmerret për ruajtjen e investimeve komunale, përmirësimin e sigurisë në trafik dhe parandalimin e dëmtimit të pajisjeve publike nga persona të pandërgjegjshëm.
Projekti parashikon gjithashtu ngritjen e një Qendre Operative, e cila do të mundësojë monitorimin e kamerave nga Policia e Kosovës në çdo orë të ditës. Lulzim Fushtica theksoi se faza e parë e këtij projekti ka treguar efikasitet të lartë në zbardhjen e aksidenteve të trafikut, veçanërisht në rastet "godit e ik", si dhe në zbulimin e vjedhjeve dhe aktiviteteve të tjera kriminale.
Kontrata trevjeçare për fazën e dytë është nënshkruar bazuar në vlerësimet e përbashkëta të rrezikshmërisë, të hartuara nga Policia dhe drejtoritë përkatëse komunale. Sipas autoriteteve, rrjeti i ri synon gjithashtu ndërgjegjësimin e qytetarëve për respektimin e rregullave të komunikacionit, ndërsa të hyrat nga gjobat e trafikut kthehen në buxhetin e kryeqytetit për të financuar projekte të reja të sigurisë dhe investime kapitale.