Shërbimet e Seksionit për Hetimin e Krimit të Drejtoria Vendore e Kufirit dhe Migracionit Korçë kanë ndaluar për kontroll automjetin e shtetasit Gj. F., 67 vjeç, banues në Korçë, në afërsi të Stacionit të Policisë Kufitare Kapshticë.
Gjatë kontrollit fizik, policia konstatoi se ai mbante të fshehura në trup 38 000 dollarë amerikanë, të padeklaruara në pikën kufitare. Më pas, gjatë kontrollit në banesën e tij, u gjetën dhe sekuestruan 35 000 euro.
Të gjitha shumat monetare u sekuestruan në cilësinë e provës materiale. Ndalimi u bë bazuar në informacione operative.
Sipas Ora News dhe A2 News, 67-vjeçari po drejtohej drejt Greqisë dhe tentonte të nxirrte paratë nga Shqipëria. Ndërsa Gazeta Tema, Top Channel, Vizion Plus dhe Lapsi.al raportojnë se ai tentonte të fuste 38 000 dollarët në Shqipëri.
Në përfundim të veprimeve procedurale, materialet ndaj Gj. F. u referuan në Prokurorinë pranë Gjykatës së Shkallës së Parë të Juridiksionit të Përgjithshëm Korçë. Ai akuzohet për veprat penale “Mosdeklarimi në kufi i të hollave dhe sendeve me vlerë” dhe “Pastrimi i produkteve të veprës penale ose veprimtarisë kriminale”.
Ngjarja ndodhi më 17 janar 2026.