Personat fizikë që kanë plotësuar Deklaratën Vjetore të Të Ardhurave Personale për vitin 2025 (DIVA) dhe rezultojnë me tatim të mbipaguar, pas zbritjes së shpenzimeve prej 48 mijë lekësh për çdo fëmijë në ngarkim si dhe shpenzimeve maksimale deri në 100 mijë lekë për arsim të dokumentuara me fatura të fiskalizuara, mund të paraqesin kërkesë për kompensim në sistemin e-Filing.
Sipas sqarimeve të administratës tatimore, para plotësimit të kërkesës në rubrikën "Pyetje të përgjithshme", duhet plotësuar të dhënat e llogarisë bankare në seksionin "Profili im" > "Detajet e bankës":
• Emri i bankës (përzgjidhet nga lista e sistemit);
• Numri i llogarisë bankare (IBAN, plotësohet manualisht);
• Kodi Swift (shfaqet automatikisht);
• Lloji i monedhës: lekë;
• Data e vlefshmërisë së llogarisë.
Të dhënat duhet të jenë të sakta, bazuar në informacionin nga banka ose aplikacioni i saj.
Më pas, në "e-Filing Im", përzgjidhet "Çështjet e mia". Në modulin "Lloji i Çështjes" (me katër opsione), zgjidhet opsioni i dytë "Pyetje të Përgjithshme" për të krijuar një çështje të re. Në formularin e bardhë të hapur plotësohet teksti i kërkesës për rimbursimin sipas vlerës së shfaqur në DIVA:
"Unë, (emër, mbiemër), me numër identifikimi (…), paraqes kërkesën për rimbursim/kompensim të DIVA."
Përveç kërkesës, duhet bashkëngjitur dokumentacioni:
• Dokumenti me të dhënat e llogarisë bankare (IBAN);
• Certifikata familjare;
• Dokumentet justifikuese për shpenzimet e arsimit të fëmijëve, përfshirë faturat e fiskalizuara dhe të dhënat e pagesave.