Administrata Tatimore ka nisur pagesat e para të kompensimit për tatimin e mbipaguar pas plotësimit të Deklaratës Vjetore të të Ardhurave Personale (DIVA 2025). Pagesat u kryen në llogaritë bankare të aplikuesve të konsideruar pa risk.
Deri tani, 3.091 individë kanë përfituar 52.823.000 lekë, që përfaqësojnë rreth 550 mijë euro. Kjo masë fiskale zbatohet për herë të parë përmes DIVA 2025 dhe synon lehtësimin e qytetarëve përmes deklarimit korrekt të të ardhurave.
Përfitues janë individët që rezultojnë me tatim të mbipaguar pas zbritjes së shpenzimeve për fëmijët në vlerë 48 mijë lekë për çdo fëmijë në ngarkim në vit. Për individët me të ardhura vjetore nën 1,2 milionë lekë, zbatohet edhe zbritja shtesë prej 120 mijë lekë për arsim. Përfitim marrin po ashtu individët pa fëmijë që rezultojnë me tepricë nga rillogaritja.
Rozana Çelmeta, drejtore e procesit të biznesit në Drejtorinë e Përgjithshme të Tatimeve, sqaroi se nuk ka afat ligjor të veçantë për paraqitjen e kërkesës për rimbursim. E drejta për kompensim nuk humbet për 5 vite, ndërsa shqyrtimi i kërkesës zgjat deri në 2 muaj. Nëse nuk kërkohet transferimi, shuma mbetet si tepricë në llogarinë e individit.
Për të përfituar kompensimin në llogari bankare, duhet plotësuar një kërkesë online në sistemin e-Filing, së bashku me dokumentet justifikuese: certifikatën familjare, faturat e shpenzimeve arsimore (për të ardhurat nën 1,2 milionë lekë) dhe IBAN-në e llogarisë në format pdf.