Administrata Tatimore ka filluar procesin e kontrollit të dokumentacionit për individët që kanë kërkuar kompensim për shpenzimet arsimore të fëmijëve, të deklaruara në Deklaratën Vjetore të të Ardhurave Personale (DIVA) 2025. Ky proces është i domosdoshëm për të konfirmuar vlefshmërinë e faturave të fiskalizuara, të cilat justifikojnë kërkesat e parashtruara.
Sipas të dhënave zyrtare, në këtë proces janë përfshirë 2161 aplikues. Kriteri bazë për përfitimin e kësaj zbritjeje, deri në vlerën maksimale prej 100 mijë lekësh, është që individët të kenë të ardhura bruto vjetore deri në 1.2 milionë lekë. Pas përfundimit të verifikimit të dokumenteve, shuma përkatëse e kompensimit do të disbursohet në llogaritë bankare të deklaruara nga qytetarët në sistemin e-Filing.
Krahas zbritjes për shpenzimet arsimore, qytetarët që kanë plotësuar DIVA-n kanë përfituar edhe zbritjen standarde prej 48 mijë lekësh për çdo fëmijë në ngarkim. Kjo e fundit është aplikuar për të gjithë deklaruesit, pavarësisht nga niveli i të ardhurave të tyre. Autoritetet tatimore njoftojnë se shqyrtimi i këtyre kërkesave kërkon kohë shtesë për shkak të natyrës specifike të verifikimit të faturave, proces ky që është thelbësor për të garantuar saktësinë e disbursimeve.