Prodhuesit vendas të detergjentëve dhe preparateve larëse paralajmërojnë shtrenjtim të çmimeve në treg duke filluar nga fillimi i muajit maj. Kjo pritet për shkak të rritjes së kostove të lëndëve të para dhe transportit, pas rritjes së çmimeve të karburanteve me 22% dhe të vajit ushqimor deri në 8%.
Shumë pluhur larës prodhohen në Shqipëri, por lënda e parë importohet nga jashtë, ndërsa sapunët larës vijnë kryesisht nga importi. Furnitorët e huaj i kanë njoftuar prodhuesit për rritje çmimesh të lëndëve të para prej 15-20%, krahasuar me periudhën para nisjes së luftës në Ukrainë. Rritja e çmimeve të lëndëve djegëse ka ndikuar drejtpërdrejt në kostot e prodhimit jashtë vendit, ndërsa tarifat e transportit janë shtrenjtuar gjithashtu.
Duke llogaritur kohën e furnizimeve të reja, që zgjat 30-45 ditë, çmimet e reja do të reflektohen në treg në fillim të majit. Shtrenjtim pritet edhe nga importuesit e preparateve të gatshme, pasi furnitorët e jashtëm tashmë kanë rritur çmimet.
Në mars 2022, me fillimin e luftës në Ukrainë, çmimet e preparateve larëse vendase u rritën 10-20%, për shkak të lëndës së parë më të shtrenjtë dhe transportit. Atëherë, rritja e çmimeve dhe ndryshimet demografike ulën kërkesën.
Sipas të dhënave të INSTAT, në vitin 2025 u importuan 68,3 mln kg për grupin “Sapuni, preparatet larëse, lubrifikuesit, qirinjtë”, me rritje 2% krahasuar me 2024. Për janar-shkurt 2026, importet ranë 13% në raport me të njëjtën periudhë të 2025.
Prodhuesit e detergjentëve theksojnë se kërkesa e konsumatorëve mbetet e dobët për shkak të emigracionit dhe ndryshimeve demografike, çka ul sasinë e importeve të lëndëve të para.