Profili në rrjetin social Facebook, i njohur me emrin Lule Gjeli, ka filluar të largojë një pjesë të konsiderueshme të përmbajtjes së tij. Pas një vëzhgimi në profilin në fjalë, rezulton se postimet e publikuara gjatë më shumë se një viti janë fshirë, duke bërë që postimi i fundit i dukshëm të datojë në 22 shtator 2025.
Ky veprim ndodh në një kohë kur për këtë profil janë shtuar pretendimet dhe denoncimet për përmbajtje fyese, denigruese dhe politike. Sipas informacioneve, Prokuroria Speciale po trajton rastin pas ankesave të shumta nga qytetarë, gazetarë dhe politikanë që pretendojnë se janë shantazhuar apo kërcënuar.
Ndër figurat publike që kanë ndërmarrë hapa ligjorë janë gazetari Berat Buzhala dhe deputetja Blerta Deliu-Kodra, të cilët kanë dorëzuar kallëzime në Prokurorinë Speciale, duke kërkuar identifikimin dhe hetimin e personit apo personave që qëndrojnë prapa këtij profili.
Nga ana tjetër, Prokuroria Speciale nuk ka dhënë një konfirmim zyrtar për zhvillimin e hetimeve. Institucioni ka deklaruar se nuk mund të pohojë apo të mohojë ekzistencën e një procedure konkrete hetimore ndaj këtij subjekti në këtë fazë.