Prokuroria pranë Gjykatës së Shkallës së Parë të Juridiksionit të Përgjithshëm Fier përfundoi hetimet dhe dërgoi për gjykim Arianit Muçon, anëtar të Këshillit Bashkiak të Lushnjës. Ndaj tij rëndon akuza për veprën penale “Falsifikimi i letërnjoftimeve, i pasaportave ose i vizave”, parashikuar në nenin 190 të Kodit Penal, si dhe “Falsifikimi i vulave, stamave ose i formularëve” në nenin 190/1.
Hetimet mbi procedimin penal nr. 419, të regjistruar më 01.04.2025 nga material i dërguar për kompetencë nga Prokuroria e Posaçme kundër Korrupsionit dhe Krimit të Organizuar (SPAK), vërtetuan se Muço ka paraqitur të dhëna të rreme në Formularin e Vetëdeklarimit “Për zbatimin e ligjit nr. 138/2015 ‘Për garantimin e integritetit të personave që zgjidhen, emërohen ose ushtrojnë funksione publike’”. Ky formular u depozitua në Komisionin Zgjedhor Zentral më 23.03.2023.
Në faqen 4 të formularit, në rubrikën 4, ku pyetet “A keni qenë ndonjëherë i ndaluar apo arrestuar nga organet ligjzbatuese për kryerjen e një vepre penale?”, Muço ka shënuar “Jo”. Në rubrikën 5, ku pyetet “A është caktuar ndaj jush ndonjëherë masë shtrënguese e sigurisë personale, në fuqi ose jo?”, ai sërish ka shënuar “Jo”.
Hetimet nxorën në dritë se Muço u ndalua në 2006 nga Prokuroria e Korçës për shfrytëzim prostitucioni, vepër për të cilën u dënua me burg dhe iu caktua masa “arrest në burg” për 5 muaj paraburgim, sipas nenit 238 të Kodit të Procedurës Penale.
Përditësime
Prokuroria e Rrethit Gjyqësor Korçë ndaloi Arianit Muçon në 15 shkurt 2006 për veprën penale "Shfrytëzim prostitucioni në rrethana rënduese", nenin 114/a/5 të Kodit Penal.