Prokuroria pranë Gjykatës së Shkallës së Parë të Juridiksionit të Përgjithshëm, Tiranë, ka përfunduar hetimet për procedimin penal nr. 8513 të vitit 2025 dhe ka dërguar për gjykim tre shtetas: Klaudio Sulejmëni, Franko Karemani dhe Eriglen Arapi. Hetimet nisën pas informacioneve operative për një aktivitet të paligjshëm në një objekt në rrugën "Zalli", në zonën e Selitës, ku gjatë kontrolleve të ushtruara në nëntor të vitit 2025, autoritetet gjetën ambientet e përshtatura si zyra dhe të akuzuarit duke ushtruar veprimtarinë.
Sipas dosjes hetimore, shtetasit Klaudio Sulejmëni dhe Franko Karemani kishin rolin e rekrutuesve të stafit. Ata trajnonin punonjësit për të zbatuar një skemë mashtrimi të njohur si "Recovery". Agjentët kontaktonin shtetas të huaj, duke i informuar rremë se kishin mundësi të rikuperonin paratë që këta të fundit kishin humbur më parë në kompani ose skema të tjera investimesh. Punonjësit grumbullonin informacione mbi gjendjen financiare të klientëve dhe historikun e humbjeve të tyre, për t'i kaluar më pas rastet për shqyrtim te Klaudio Sulejmëni dhe Franko Karemani.
Për këto veprime, Klaudio Sulejmëni dhe Franko Karemani akuzohen për veprën penale "Mashtrimi kompjuterik", parashikuar nga neni 143/b/2 i Kodit Penal. Ndërsa shtetasi Eriglen Arapi akuzohet për veprën penale "Moskallëzim krimi", sipas nenit 300 të Kodit Penal. Çdo person prezumohet i pafajshëm deri sa të vërtetohet fajësia e tij me vendim gjyqësor të formës së prerë.
Përditësime
Prokurori Bledar Valikaj ka avancuar hetimet mbi skemën e mashtrimit, pas provave të siguruara në operacionin e datës 10 nëntor 2025. Gjatë kontrollit, autoritetet sekuestruan 9 njësi qendrore, 2 laptopë, 2 celularë dhe dokumentacion përkatës. Një punonjëse e subjektit ka dëshmuar mbi rolet e të dyshuarve në këtë skemë, ndërsa mbrojtja e Eriglen Arapit pretendon se klienti i tyre ndodhej rastësisht në vendngjarje për një takim me shtetasin Klaudio Sulejmëni.