Prokuroria pranë Gjykatës së Shkallës së Parë të Juridiksionit të Përgjithshëm Tiranë ka regjistruar procedimin penal nr. 156/2026 për veprën penale të evazionit fiskal, të parashikuar në nenin 180 të Kodit Penal.
Pas lejimit nga gjykata dhe me kërkesë të organit të procedimit, janë ushtruar kontrolle në disa subjekte që ofrojnë shërbime postare në kryeqytet, në kuadër të hetimit për tregtimin e mallrave pa fatura tatimore.
Deri më tani, nga kontrollet janë sekuestruar:
- sasi të konsiderueshme mallrash të marra në dorëzim pa fatura tatimore;
- 13 milionë lekë;
- dokumentacion shoqërues.
Prokuroria vlerëson se këto materiale përbëjnë prova të paligjshmërisë në drejtim të evazionit fiskal, ndërsa shuma e parave dyshohet se rrjedh nga aktiviteti i paligjshëm.
Hetimet vijojnë për identifikimin e shitësve realë dhe dokumentimin e plotë të veprimtarisë së kundërligjshme.