Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka njoftuar më 15 prill se ka vendosur sekuestro preventive dhe bllokim të menjëhershëm të llogarive bankare të gjashtë shoqërive tregtare, me një total prej 73.051.436 lekë.
Nga hetimet rezulton se këto subjekte dyshohen se kanë qenë pjesë e një skeme të organizuar, ku janë lëshuar dhe përdorur fatura fiktive për punime dhe shërbime të pakryera. Qëllimi ka qenë përfitimi i padrejtë i TVSH-së dhe ulja e detyrimeve fiskale.
Vlerat e bllokuara për secilën shoqëri janë:
- “OLT-FLOR” shpk – 6.479.834 lekë;
- “OLTI-Group” shpk – 1.542.834 lekë;
- “ALBAVIA” shpk – 23.056.593 lekë (TVSH + TF);
- “Kukës Chrome Minerals” shpk – 24.570.607 lekë (TVSH + TF);
- “Troci 2005” shpk – 10.521.085 lekë (TVSH + TF);
- “STANDART” shpk – 6.880.483 lekë (TVSH + TF).
Nga analiza financiare, vlera e transaksioneve të dyshuara tejkalon 73 milionë lekë, ndërsa dëmi i mundshëm ndaj buxhetit të shtetit lidhet me mosdeklarimin dhe shmangien e tatimeve. Sipas një burimi, dëmi arrin rreth 500 mijë euro.
Në këtë fazë, organet janë urdhëruar për:
- Sekuestrimin e llogarive bankare në banka të nivelit të dytë;
- Bllokimin e menjëhershëm për të parandaluar lëvizjen e fondeve;
- Vijimin e hetimeve për identifikimin e personave të përfshirë.
Hetimet vazhdojnë për veprat penale “Krijimi i skemave mashtruese në lidhje me TVSH” dhe “Fshehja e të ardhurave”, pa përjashtuar masa të tjera procedurale.