Prokuroria e Tiranës ka kaluar te Struktura e Posaçme kundër Korrupsionit dhe Krimit të Organizuar (SPAK) dosjen e atentatit të ndodhur në rrethrrotullimin e Rinasit në muajin nëntor 2025. Në këtë ngjarje humbën jetën Gilmando Dani dhe Muçi Shaljani, i njohur me nofkën Sheqeri.
Pas verifikimeve paraprake dhe analizës së provave të mbledhura në vendngjarje, Prokuroria e Tiranës ka arritur në përfundimin se çështja dyshohet të jetë kryer në kuadër të një grupi të strukturuar kriminal. Për këtë arsye, ajo ka shpallur moskompetencë dhe e ka referuar çështjen te SPAK.
Hetimet fillestare u përqendruan në identifikimin e autorëve, lëvizjet e tyre dhe motivet e mundshme. Indicitë e mbledhura flasin për një organizim paraprak dhe përfshirje të më shumë se një personi, çka ka ngritur dyshime të forta për veprimtari të strukturuar kriminale.
Ngjarja u regjistrua në një zonë me qarkullim të lartë, pranë njërit nga hyrje-daljet kryesore të Tiranës.
Përditësime
SPAK ka identifikuar në dosjen e atentatit në Rinas:
• Gilmando Dani, krahu i djathtë i Emiljano Shullazit.
• Muçi Shaljani (alias Sheqeri), agjent i AMP.