Prokuroria Themelore në Ferizaj ka njoftuar se me vendim të Prokurorit të Shtetit të Departamentit të Krimeve të Rënda ka ndaluar për 48 orë dy persona të dyshuar.
Sipas njoftimit për media, njëri nga të ndaluarit është një noter në komunën e Ferizajt, i dyshuar për veprën penale "Keqpërdorimi i pozitës apo autoritetit zyrtar", të paraparë në nenin 414 të Kodit Penal të Republikës së Kosovës.
Personi tjetër dyshohet për veprën penale "Blerja, pranimi ose fshehja e sendeve të përfituara me kryerjen e veprës penale", sipas nenit 333 të Kodit Penal.
Ndalimi është rezultat i vazhdimit të hetimeve të lidhura me rastin paraprak, ku e njëjta prokurori kishte ndaluar tre persona të tjerë për dyshimin e keqpërdorimit të detyrës zyrtare.
Kështu, numri total i të ndaluarve në këtë çështje penale shkon në pesë.
Prokuroria Themelore në Ferizaj do të vazhdojë me procedurat dhe veprimet e nevojshme ligjore ndaj të pandehurve.