Prokuroria Themelore në Ferizaj ka njoftuar ndalimin e tre personave në kuadër të një operacioni kundër korrupsionit dhe krimeve ekonomike. Në bashkëpunim me Drejtorinë për Hetimin e Krimeve Ekonomike dhe Korrupsionit dhe në bazë të urdhëresës së Gjykatës Themelore në Ferizaj, janë kontrolluar disa prona dhe lokale.
Sipas vendimit të Prokurorit të Shtetit nga Departamenti i Krimeve të Rënda, të ndaluarit janë:
• A.S., noter nga komuna e Vitisë
• I.M., nga Prishtina
• F.N., nga komuna e Dragashit
Personat e lartpërmendur dyshohen për veprat penale "Legalizimi i përmbajtjes së pavërtetë në bashkëkryerje", "Falsifikimi i dokumenteve" dhe "Keqpërdorimi i pozitës apo autoritetit zyrtar", në përputhje me Kodin Penal të Republikës së Kosovës.
Ndalimi i tyre pason hetimet e mëhershme lidhur me të njëjtën çështje, gjatë të cilave ishin ndaluar edhe pesë persona të tjerë. Institucionet e drejtësisë kanë bërë të ditur se do të vazhdojnë me procedurat ligjore për zbardhjen e plotë të rastit.